Թրամփը հայտարարել է, որ ԱՄՆ նախագահ ընտրվելու դեպքում մաքսատուրքեր կսահմանի Չինաստանի նկատմամբ

ԱՄՆ նախագահի հանրապետական ​​թեկնածու Դոնալդ Թրամփը հայտարարել է, որ նոյեմբերին նախագահ ընտրվելու դեպքում կվերականգնի Չինաստանի նկատմամբ մաքսատուրքերը։ Ըստ նրա, չինական ապրանքների նոր մաքսատուրքերը կարող են գերազանցել 60 տոկոսը։

«Մենք պետք է դա անենք, - ասել է Թրամփը Fox News-ին տված հարցազրույցում։- «Նկատի ունեմ, որ արժեթղթերի շուկան քիչ մնաց փլուզվեր, երբ հայտարարվեց, որ ես ռեկորդային հաղթանակ եմ տարել  Այովա նահանգի նախնական ընտրություններում: Եվ հետո, երբ ես հաղթեցի Նյու Հեմփշիրում, ֆոնդային շուկան խելագարի պես փլուզվեց»:

Պատասխանելով այն հաղորդման մասին, որ նա դիտարկում է ընտրվելու դեպքում չինական ապրանքների վրա 60 տոկոս մաքսատուրքեր սահմանելու հնարավորությունը, Թրամփը պատասխանել է. «Չէ, ես կասեի, որ, հնարավոր է, դա ավելի մեծ մի բան լինի»։

Թրամփը նաև մերժել է Չինաստանի հետ ևս մի նոր առևտրային պատերազմ սկսելու ենթադրությունը։

«Սա առևտրային պատերազմ չէ։ Ես Չինաստանի հետ ամեն ինչում հաջողության եմ հասել»,- ասել է Թրամփը։

«Ես ուզում եմ, որ Չինաստանում ամեն ինչ լավ լինի, ուզում եմ: Եվ ինձ շատ է դուր գալիս  նախագահ Սին (Չինաստանի նախագահ Սի Ծինփին – խմբ.): Նա իմ շատ լավ ընկերն է եղել իմ նախագահության ժամանակ»,-  ավելացրել է նա։

Թրամփը ԱՄՆ նախագահի իր կուսակցության թեկնածուների շարքում առաջատարն է և մտադիր է նոյեմբերի 5-ին կայանալիք ԱՄՆ ընտրություններում մարտահրավեր նետել երկրի գործող դեմոկրատ նախագահ Ջո Բայդենին։

Թրամփը մաքսատուրքեր է սահմանել հարյուր միլիարդավոր դոլարներ արժողությամբ  չինական ապրանքների վրա 2018 և 2019 թվականներին։

Բայդենի վարչակազմը պահպանել է մաքսատուրքերը և ավելացրել նոր սահմանափակումներ, որոնք արգելում էին առաջատար կիսահաղորդիչների և դրանց արտադրության համար սարքավորումների արտահանումը՝ վկայակոչելով անվտանգության նկատառումները:

ԱՄՆ առևտրային ներկայացուցիչը վերանայում է մաքսատուրքերը։