Դատախազը ընթերցեց մեղադրական եզրակացությունը․ Գարիկ Գալեյանը հայտարարեց, որ իրեն մեղավոր չի ճանաչում

Երևանի ընդհանուր իրավասության դատարանում այսօր՝ հունվարի 30-ին, 44–օրյա պատերազմում զոհված զինծառայող Մխիթար Գալեյանի հոր` «Որդիների կանչ» ՀԿ–ի անդամ Գարիկ Գալեյանի գործով դատական նիստին մեղադրող դատախազը ընթերցեց մեղադրական եզրակացությունը։

Գարիկ Գալեյանին մեղադրանք է առաջադրվել թմրամիջոցի իրացման, ֆիզիկական ներգործության եւ խուլիգանության մեջ։ Դատարանում Գալեյանը հայտարարեց, որ իրեն մեղավոր չի ճանաչում։

Բացման խոսքով հանդես եկավ Գալեյանի փաստաբան Վահան Հովհաննիսյանը, նշելով, որ այդ մեղադրանքով պետությունը՝ ի դեմս իրավապահ մարմինների նպատակ է հետապնդել նսեմացնել Գարիկ Գալեյանի անձը, նրա պատիվն ու հեղինակությունը, պիտակավորել նրան որպես թմրամիջոց իրացնող անձ․

«2023 թվականի ապրիլի 2-ին ԱԺ նախագահ Ալեն Սիմոնյանը հասարակական կարգը խախտելու ուղղակի դիտավորությամբ, հասարակության նկատմամբ անհարգալից, բարոյական նորմերի նկատմամբ բացահայտ արհամարհական վերաբերմունք դրսևորելով նա թքել էր անձի աչքին։ ՔԿ-ի հաղորդագրության համաձայն՝ այդ դեպքն իր մեջ հանցակազմ չի պարունակում։ Ինչպե՞ս է ստացվում, որ Ալեն Սիմոնյանի կողմից անձի դեմքին թքելը չի համարվում խուլիգանություն, իսկ Գարիկ Գալեյանի դեպքը համարվում է խուլիգանություն։ Մենք այդ պարզաբանումը վարույթն իրականացնող մարմիններից չենք ստացել»։

Վահան Հովհաննիսյանի խոսքով՝ Գալեյանին առաջադրված մեղադրանքն օրինական չէ։

Երևանի ընդհանուր իրավասության դատարանում այսօր՝ հունվարի 30-ին, ընթանում է 44–օրյա պատերազմում զոհված զինծառայող Մխիթար Գալեյանի հոր` «Որդիների կանչ» ՀԿ–ի անդամ Գարիկ Գալեյանի գործով դատական նիստը։

Հիշեցնենք, որ 2023 թ. սեպտեմբերի 8-ին հայտնի էր դարձել, որ Գալեյանը ձերբակալվել է։ Ավելի ուշ Քննչական կոմիտեն հայտնել էր, որ նրա մոտ 3 փաթեթ մարիխուանա է հայտնաբերվել։ Գալեյանի դեմ նախաձեռնվել է քրեական վարույթ ՀՀ քրեական օրենսգրքի 393-րդ հոդվածի 1-ին մասի հատկանիշներով։ Այն միացվել է ավելի վաղ Գալեյանի առնչությամբ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում ՀՀ քրեական օրենսգրքի 195-րդ հոդվածի 2-րդ մասի 5-րդ կետով և 297-րդ հոդվածի 2-րդ մասի 1-ին կետով նախաձեռնված քրեական վարույթին։

Նախաձեռնված վարույթից հետո Գալեյանը կալանավորվեց, որոշ ժամանակ անց նրա նկատմամբ որպես գրավ կիրառվեց 2 միլիոն դրամը և տնային կալանքը։