Ինչ-որ տարօրինակ բան ստիպում է ալպյան այծերին վազել ուղիղ գայլերի որջը

Ալպյան այծերը, որպես կանոն, Եվրոպայի անվտանգլեռնային բարձրություններից ցած են իջնում ցերեկվա ժամերին՝ ավելի ցածր բարձրություններում արածելու համար: Սակայն կենդանիների շարժմանը հետևող հետազոտողները նկատել են, որ նրանք գնալով ավելի հաճախ են գիշերային ապրելակերպ վարում՝ լեռներից իջնելով գիշերային ժամերին, գրում է Science Alert-ը։

Ֆերարայի համալսարանի վարքագծային էկոլոգ Բենջի Ջոնսի վկալությամբ, այս այծերն այժմ ավելի շատ ժամանակ են հանգստանում ցերեկային ժամերին, գրում է Focus-ը։ Սակայն մութն ընկնելուն պես կենդանիներն ավելի հաճախ են իջնում ​​լեռներից արածելու համար, ինչը հսկայական վտանգ է պարունակում, քանի որ գայլերն այս վայրերում  թափառում են հատկապես մթության քողի տակ:

Հետազոտության հեղինակները մտահոգված են, որ այս վարքագիծը մեծ խնդիր է ալպյան այծերի ամբողջ պոպուլյացիայի համար: Բաց արոտավայրերը, որտեղ արածում են այծերը, գրեթե թաքստոցներ չունեն, ինչը   չափազանց դժվարացնում է գիշատիչներից ապաստան գտնելը։

Ֆերարայի համալսարանի թիմը ակնկալում էր այծերի ավելի բարձր գիշերային ակտիվություն տեսնել Ալպերի այն շրջաններում, որտեղ գայլեր չկան: Սակայն հետազոտության արդյունքները ցույց են տալիս, որ վիճակն այլ է։ Ըստ հետազոտության համահեղինակ Բրիվիո Օլիվիայի, նա և իր գործընկերները հայտնաբերել են այծերի գիշերային ակտիվության աճ այն վայրերում, որտեղ գայլեր են ապրում:

Հետազոտության ընթացքում գիտնականները 2006-ից 2019 թվականներին հետևել են գրեթե հիսուն ալպյան այծի: Արդյունքները ցույց են տալիս, որ կենդանիները աստիճանաբար անցնում են գիշերային ապրելակերպի, դա պայմանավորված է բարձր առավելագույն ջերմաստիճաններով: Պարզ ասած, անհավանական շոգից փրկվելու համար կենդանիները բառացիորեն վազում են գիշատիչների որջը:

Ժամանակին ալպյան այծերը տարածված էին ողջ Եվրոպայում, սակայն 1800-ականներին նրանց թիվը կրճատվել էր՝ հասնելով ընդամենը 100-ի՝ որսորդների պատճառով: 1854 թվականին մտցվեց այս կենդանիների որսի արգելք, ինչի արդյունքում այս տեսակին հաջողվեց վերականգնվել։ Սակայն այժմ նրանք կրկին սպառնալիքի տակ են։

Մինչ օրս այս կենդանիների պոպուլյացիաները պահպանում են ցածր գենետիկական բազմազանություն, ինչը նրանց խոցելի է դարձնում մի շարք սպառնալիքների նկատմամբ, այդ թվում՝ մուտացիայի խնդիրներ. հիվանդությունների  նկատմամբ զգայունություն, լրացուցիչ սթրես կլիմայի փոփոխության պատճառով:

Հետազոտության հեղինակները կարծում են, որ ալպյան այծերի զառիթափ, քարքարոտ միջավայրն ավելի բարդ է, քան նախկինում ենթադրվում էր: Եվ, հետևաբար, չափազանց դժվար է հարմարվել այստեղ մթության մեջ, հատկապես ցերեկը շարժվելուն հարմարեցված աչքերով: Այս ամենը, ինչպես նաև արոտավայրերում գայլերի ոհմակների առկայությունը նվազեցնում են կենդանիների գոյատևման հնարավորությունը։