Ադրբեջանի նախագահի ընտրություններն անցկացվում են այն ժամանակ, երբ չկան ազատ ԶԼՄ-ներ, լրագրողները ձերբակալված են․ BBC

Ադրբեջանի նախագահի արտահերթ ընտրություններն անցկացվում են այն ժամանակ, երբ չկան ազատ լրատվամիջոցներ, իսկ լրագրողներն ու ակտիվիստները ձերբակալված են։ Այս մասին գրել է BBC Persian-ը։

Նշվում է, որ Իլհամ Ալիևը, որը հավակնում է վերընտրվել հինգերորդ ժամկետով, շատերի կողմից դիտարկվում է որպես ամենահավանական հաղթող: Նրա վեց մրցակիցները, հիմնականում իշխանամետ պատգամավորները, համարվում են ֆիկտիվ թեկնածուներ, իսկ երկրի հիմնական ընդդիմադիր կուսակցությունները բոյկոտել են ընտրությունները:

ԶԼՄ-ներում ընտրությունների լուսաբանումը սահմանափակվում է քվեարկության օրվան նախապատրաստվելու վերաբերյալ Կենտրոնական ընտրական հանձնաժողովի պաշտոնական հաղորդագրություններով: Նախագահի թեկնածուների մասին լուրերը անհամաչափ են լուսաբանվում, իսկ ներկայիս առաջնորդի գործունեությունը մշտապես ուշադրության կենտրոնում է:

Տարակարծիք ձայներն ու կարծիքները բացակայում են հիմնական լրատվամիջոցներից, քանի որ կառավարությունը խիստ վերահսկում է տեղեկատվական դաշտը:

«Լրագրողներ առանց սահմանների» կազմակերպությունն ասում է. «Իլհամ Ալիևը ոչնչացրել է բազմակարծության նվազագույն հետքերը և 2014 թվականից ի վեր նա անխղճորեն փորձել է լռեցնել մնացած քննադատներին»:

Հիմնական լրատվամիջոցներում անհամաձայնների ձայները բացակայում են, քննադատաբար տրամադրված լրագրողները ձերբակալվում և բանտարկվում են, իսկ հասարակությունը, որպես կանոն, ստիպված է լինում դիմել արտասահմանյան լրատվամիջոցներին՝ նախագահի ընդդիմախոսների տեսակետներն իմանալու համար: Բոլոր հեռուստաալիքները՝ պետական AzTV-ից և սոցիալական հեռուստացանցից մինչև Ալիևի հարազատներին կամ մերձավորներին պատկանող մասնավոր հեռուստաալիքներ, վերապատմում են կառավարության վարկածները։ Վերջին տարիներին բոլոր ընդդիմադիր և անկախ թերթերը կամ փակվել են, կամ ստիպված են եղել միանալ կառավարությանը։ Մնացած մի քանի ընդդիմադիր լրատվական կայքեր նույնպես ենթարկվում են պետական գրաքննության։

Հոդվածում նշվում է․ «Անհասկանալի է, թե արդյոք լրագրողների կալանավորումը կապված է առաջիկա ընտրությունների հետ, քանի որ դա տեղի է ունենում Բաքվի և Վաշինգտոնի միջև լարվածության ֆոնին։ Այս ձերբակալությունները հիմնականում վերաբերել են Abzas Media-ին և Channel 13-ին առնչվողներին: Երկու առցանց լրատվամիջոցներն էլ հայտնի են պետական ​​պաշտոնյաների շրջանում կոռուպցիայի վերաբերյալ իրենց հետաքննական հաղորդումներով»: