ՄԻ ԲԱՆ ԷԼ ԷԺԱՆ ԵՆ ՎՃԱՐՈՒՄ TV-ՆԵՐԸ

Տեւական ժամանակ է՝ մի շարք հեռուստաընկերություններ, որոնք մեծ պարտքեր են կուտակել «Հայաստանի հեռուստատեսային եւ ռադիոհաղորդիչ ցանց» ՓԲԸ-ին, կանգնած են հեռարձակումից զրկվելու վտանգի առաջ: Հայաստանի ողջ տարածքում սփռման համար յուրաքանչյուր հեռուստաընկերություն «վիշկային» տարեկան վճարում է 72 մլն դրամ, մայրաքաղաքային սփռման համար՝ մոտ 20 մլն դրամ, ինչը մեծ ֆինանսական բեռ է ընկերությունների համար:

Հայաստանում BBC եւ CNN չկա, մեր TV-ները չունեն մեծ եկամուտներ, բոլորը սեփականատերերից վճարվող դոտացիաներով են գոյատեւում։ Հատկապես մեծ պարտքեր ունեն «Շանթ» հեռուստաընկերությունը, ATV-ն, Freenews-ը, «Դար 21»-ն ու «Ֆորտունա»-ն: ՀՌՀ նախագահ Տիգրան Հակոբյանը դեռ նախորդ տարի անդրադառնալով այս թեմային՝ ԱԺ ամբիոնից հայտարարեց, որ հեռուստատեսային եւ ռադիոհաղորդիչ ցանցն առաջիկայում պատրաստվում է դադարեցնել որոշ հեռուստաընկերությունների հեռարձակումը։ Ավելին՝ «ցերեկվա ժամերին 2 ժամով մեկ շաբաթ կդադարեցվի մի քանի հեռուստաընկերությունների հեռարձակումը․ այդ հեռուստաընկերություններն են՝ «Շանթ»-ը, ATV-ն, Freenews-ը, «Դար 21»-ը եւ «Ֆորտունա»-ն»,- հայտնել էր նա։

Մենք մեկնաբանություն խնդրեցինք «Հայաստանի հեռուստատեսային եւ ռադիոհաղորդիչ ցանց» ՓԲԸ-ի գլխավոր տնօրեն Մուշեղ Միլիտոնյանից` հասկանալու համար, թե ինչ վիճակում են TV-ներն այժմ: Մեր նախորդ զրույցի ժամանակ Միլիտոնյանն ասել էր, որ որոշ TV-ների հետ ընդհանուր հայտարարի են եկել, ժամանակացույց կազմել, որ մաս-մաս պարտքերը մարեն: Երեկ Մուշեղ Միլիտոնյանը «Հրապարակի» հետ զրույցում ասաց, որ պարտքեր ունեցող հեռուստաընկերությունների 99 տոկոսը մարել է պարտքը:

Նրա պնդմամբ` միայն մեկ հեռուստաընկերություն չի մարել այն, սակայն թե որ TV-ի մասին է խոսքը, չասաց։ «Մենք նախարարությանը ենթակա մարմին ենք, հիմնականում այդ հարցերով նախարարությունն է զբաղվում: Ես չեմ ուզում մամուլին տեղեկություն տալ: Սակայն ասեմ, որ պարտքեր ունեցողների 99 տոկոսը վճարել է պարտքերը»- ասում է նա: ԲՏԱ նախարար Մխիթար Հայրապետյանն այցելության էր եկել Ձեզ, ի՞նչ հարցեր եք քննարկել, հնարավո՞ր է «վիշկային» տարեկան վճարումների չափը նվազեցնելու հարցն էլ է քննարկվել՝ չէ՞ որ հեռուստաընկերությունները նշում են, որ դժվար է նման ահռելի գումարներ վճարելը, եւ արդարացված չէ գումարի այդ չափը։ «Ինչո՞ւ պետք է գումարի չափ փոխենք: TV-ները 2021 թվականի սկզբին` բոլորն անխտիր, նամակով, առաջարկություն-պահանջ-խնդրանքով դիմել են, այն ժամանակ կոչվում էր Տնտեսական մրցակցության պետական պաշտպանության հանձնաժողով: Դա շատ երկար վարույթ էր, տվյալ հանձնաժողովն ամեն ինչ ուսումնասիրել է, գնագոյացում եւ բոլոր-բոլոր գործոնները, ապա կարճել TV-ների բողոքները եւ որոշում է ընդունել, որ դեռ մի բան էլ էժան գներ են ներկայացվել TV-ներին: Խնդրում եմ՝ Դուք հաշվի առեք, որ այդ գները գործում են 2017 թվականից, իսկ Հայաստանում ամեն ինչի գներն ավելացել են, սակայն TV-ների համար նախատեսված գումարի չափը մնացել է նույնը: Այնպես որ, իջեցնելու մասին խոսք չկա, որովհետեւ այն չունի որեւէ տնտեսական հիմնավորում: Բոլորն էլ կարողանում են վճարել, 99 տոկոսն արդեն իսկ օպերատիվ կերպով պարտքերը վճարել է: Միայն մեկի հետ խնդիր ունենք․․․ կան նաեւ մեկ-երկուսը, որոնք եկել են, նոր ժամանակացույց են կազմել»,- ասաց Միլիտոնյանը: