«ՀՐԱՊԱՐԱԿ». ԾՆՈՂՆԵՐԻ ՄԻ ՄԱՍԸ ՄԵՐԺԵԼ Է ՎԱՀԵ ՂԱԶԱՐՅԱՆԻ ԱՌԱՋԱՐԿԸ

Եռաբլուրում կարմիր բերետավորների եւ 44-օրյա պատերազմում զոհված զինծառայողների ծնողների միջեւ տեղի ունեցած միջադեպից երկու տարի անց ներքին գործերի նախարար Վահե Ղազարյանն «ափսոսանք» հայտնեց եւ ծնողներին հանդիպման առաջարկ արեց։ Եռաբլուրում բռնությամբ բերման ենթարկված «Որդիների կանչ» ՀԿ-ի ծնողները մի քանի օր մտածելուց հետո հայտնել են, որ հրաժարվում են հանդիպման առաջարկից։ ««Որդիների կանչ» ՀԿ-ն հայտարարում է, որ մերժում է այս իշխանության որեւէ ներկայացուցչի կողմից ցանկացած առաջարկ։ Սա այն վարչախումբն է, որի օրոք դավաճանվեցին մեր որդիները, հանձնվեցին Հայաստանի ինքնիշխան տարածքները, անմխիթար կացարանում ողջ-ողջ այրեցին 15 զինծառայողի, Արցախը ենթարկեցին ցեղասպանության եւ հայաթափման, հիմա էլ խաղաղ պայմաններում սպանվում են զինվորականներ, հարձակվում են Հայ առաքելական սուրբ եկեղեցու վրա, Հայրենիքն ու պետությունը նույնականացվում են։

«Որդիների կանչ» ՀԿ-ն պայքարելու է այս ազգադավ իշխանության դեմ եւ ամեն ինչ անելու է, որ շուտափույթ ազատվենք այս վարչախմբից, որի ներկայացուցիչներից մեկն էլ Վահե Ղազարյանն է»,- կոլեկտիվ որոշում կայացնելուց հետո նման բովանդակությամբ հայտարարություն տարածվեց ՀԿ-ի ֆեյսբուքյան էջում։

«Հրապարակ»-ին հայտնի դարձավ, որ հանդիպման առաջարկ է արվել զոհվածների շուրջ 20 ծնողների, որոնց մի մասն ընդունել է առաջարկը եւ հունվարի 26-ին գնալու է Վահե Ղազարյանի հետ հանդիպման։ ՆԳ նախարարի մամուլի խոսնակ Նարեկ Սարգսյանից հետաքրքրվեցինք, թե ինչու միջադեպից միայն երկու տարի անց Վահե Ղազարյանը ծնողներին տեսնելու ցանկություն հայտնեց, եւ ինչպես են վերաբերվում այն հանգամանքին, որ նախարարի հետ հանդիպման առաջարկը մերժվեց շատերի կողմից։ «Հարգանքով ենք մոտենում հանդիպման առաջարկը մերժած ծնողների որոշմանը։ Թե ինչու նախարարը հիմա որոշեց հանդիպման առաջարկ անել, ես չեմ կարող մեկնաբանել, քանի որ դեռ հանդիպումը չի կայացել, այն տեղի կունենա հունվարի 26-ին։ Կան ծնողներ, ովքեր ընդունել են առաջարկը»,- ասաց Սարգսյանը։ 

Հիշեցնենք, որ հայտնի միջադեպը տեղի ունեցավ 2022թ․ սեպտեմբերի 21-ին։ Զոհվածների ծնողները գիշերվանից Եռաբլուրում էին, որպեսզի արգելեն Փաշինյանի ու նրա թիմակիցների մուտքը պանթեոն։ Առավոտյան ժամը 7-ի սահմաններում, նախքան Փաշինյանի ժամանելը, ոստիկաններն ուժի գործադրմամբ բացեցին ՔՊ-ականների ճանապարհը՝ բերման ենթարկելով անգամ մայրերին։ Դեպքից հետո ոստիկանությունը հաղորդագրություն տարածեց՝ հորդորելով միջադեպը չօգտագործել քաղաքական նպատակներով ու նկատառումներով։

«Սեպտեմբերի 21-ին ոստիկանության ծառայողները Եռաբլուրի զինվորական պանթեոնում կազմակերպված միջոցառումների ժամանակ իրականացրել են իրենց գործառութային պարտականությունները, ինչի ընթացքում տարածքից ոստիկանություն են բերվել քաղաքացիներ: Ոստիկանության պետի հանձնարարությամբ այդ գործողություններն ուսումնասիրվում են, եւ հանրությունը կիրազեկվի արդյունքների մասին»,- ասված էր հաղորդագրության մեջ։ Ոստիկանության ներքին անվտանգության վարչությունում միջադեպի օրը ծնողներին քաշքշած կարմիր բերետավորների նկատմամբ ծառայողական քննություն նշանակվեց։ Ծնողների բողոքների հիման վրա Քննչական կոմիտեն քրեական վարույթ նախաձեռնեց։ Ավելի քան մեկ տարվա քննությունից հետո վարույթն իրականացնող մարմինը գործը կարճեց՝ հանցակազմի բացակայության հիմքով։