«Նոր Հայկ Սարգսյանի կարիք չի լինի, ես 15 տարի հետո էլ կլինեմ ԱԺ-ում». Աղազարյանին զարմացրեց ՔՊ-ականի ինքնավստահությունը

Ես այս օրենքի ոգու հետ համաձայն չեմ. Ձեզ մոտ հարց չի առաջանո՞ւմ, թե այս օրենքն ընդունելու դեպքում որտեղ են հայտնվում 13, 14, 15մ 21, 22, 23 տարեկան պատանիներն ու երիտասարդները: Այս մասին այսօր՝ հունվարի 11-ին, ԱԺ պաշտպանության և անվտանգության մշտական հանձնաժողովի նիստում «Զինվորական ծառայության և զինծառայողի կարգավիճակի մասին» օրենքում լրացումներ և փոփոխություն կատարելու մասին» օրենքի նախագծի քննարկման ժամանակ նշեց ՔՊ-ական պատգամավոր Հովիկ Աղազարյանը:

Հիշեցնենք, որ այս նախագծով ՔՊ-ական պատգամավոր Հայկ Սարգսյանն առաջարկում է 27 տարին լրացած և պարտադիր զինվորական ծառայություն չանցած քաղաքացիներին հնարավորություն տալ գումար վճարել եւ ավելի քիչ ժամկետով զինծառայություն անցնել, կամ ընդհանրապես զինծառայություն չանցնել՝ վճարելով 15 մլն դրամ եւ ազատվելով քրեական պատասխանատվությունից:

Հայկ Սարգսյանն էլ արձագանքեց, որ 18-27 տարեկան երիտասարդները այս օրենքի շահառու չեն, նրանք պետք է պարտադիր զինվորական ծառայության լինեն, իսկ ավելի երիտասարդները զորակոչվելու համար պետք է բուժզննություն անցնեն:

Աղազարյանը հակադարձեց. «Մենք երկար ժամանակ գործընկերներ ենք եւ ես վստահ եմ, որ դուք իմ հարցի իմաստը հասկանում եք: Հետեւաբար, իմ հարցին պետք է պատասխանեք ըստ էության:

 «12 տարեկան տղայի պապան չի՞ մտածի, որ 15 տարի հետո մեկ ուրիշ Հայկ Սարգսյան կգա ԱԺ և նմանատիպ օրենք կընդունի։ Չե՞ք անհանգստանում, որ Դուք բացասական վարքագիծ եք մտցնում պատանիների և երիտասարդների շրջանում»,- հարցեց պատգամավորը։

Սարգսյանը բացասական պատասխան տվեց. «Ոչ, նման բան չեմ մտածում: Նախ, ուրիշ Հայկ Սարգսյանի կարիք չի լինի, ես կլինեմ ԱԺ-ում, եթե մեր ժողովուրդը գտնի, որ արժանի եմ.

«Գործող կարգավորումներով 27 տարին լրացած անձինք չեն կարող ծառայել բանակում: Օրենքի նպատակն այն է, որ այն 5 հազար քաղաքացիներին, որոնց ենթադրաբար պետք է բերենք դատենք, բայց փորձը ցույց է տալիս, որ չենք էլ կարողանում բերենք, դատենք, նրանց տանք հնարավորություն ծառայելու կամ գումար վճարելով ազատվելու զինվորական ծառայությունից: Այս օրենքը վերաբերում է նրանց, որոնք այսօր զինապարտ չեն, այսինքն նպատակը հավելյալ ռեսուրս բերելն է: Սա զորակոչին չի խոչընդոտում»:

Հովիկ Աղազարյանն էլ արձգանքեց. «Պարոն Սարգսյան, շատ լավ է ձեր ինքնավստահությունը, որ 15 տարի հետո էլի պատգամավոր կլինեք, հետեւաբար ժամանակ կունենաք,  հաշվարկներ կատարելու»:

Ավելի վաղ NEWS.am-ը հայտնել էր, որ այս նախագծով առաջարկվում է 27 տարին լրացած և պարտադիր զինվորական ծառայություն չանցած քաղաքացիներին ընտրել այս տարբերակներից մեկը.

զինվորական ծառայություն անցնել 24 ամիս ժամկետով,

զինվորական ծառայություն անցնել 12 ամիս ժամկետով և վճարել 2.5 միլիոն դրամ,

զինվորական ծառայություն անցնել 6 ամիս ժամկետով և վճարել 5 մլն դր.,

զինվորական ծառայություն անցնել 1 ամիս ժամկետով և վճարել 10 մլն դր.,

զինվորական ծառայություն չանցնել և վճարել 15 մլն դրամ։