Հայտնի է Ադրբեջանի սահմանապահ ծառայության ուղղաթիռի կործանման պատճառը

Ադրբեջանի գլխավոր դատախազությունը հայտնել է նոյեմբերի 30-ին Ադրբեջանի սահմանապահ ծառայության ուղղաթիռի կործանման պատճառը, որի հետևանքով 14 մարդ էր մահացել։

Ադրբեջանի գլխավոր դատախազի առաջին տեղակալ Էլչին Մամեդովը հայտարարել է, որ կործանված Մի-17 ուղղաթիռի «սև արկղերը» աշխատունակ են, դրանից հնարավոր է ինֆորմացիա ստանալ։

«Նախաթռիչքային նախապատրաստման ընթացքում խախտումներ չեն հայտնաբերվել։ Բազմաթիվ ցուցմունքներ են ձեռք բերվել վկաներից։ Նախնական տվյալներով՝ ավիավթարի պատճառը եղել է օդաչուների կոպիտ սխալը, որոնք հաշվի չեն առել քամու ուժգնությունն ու ուղղությունը, ինչը հանգեցրել է աղետի», - ասել է Մամեդովը։

Նոյեմբերի 30-ին Խըզը շրջանում գտնվող «Ղարահեյբաթ» զորավարժարանում ուսումնական թռիչքի ժամանակ կործանվել էր Ադրբեջանի Պետական սահմանապահ ծառայության ռազմական ուղղաթիռը, որի հետևանքով մահացել էր 14 մարդ, ևս երկուսը ստացել տարբեր ծանրության վնասվածքներ։