Ադրբեջանցիները կրակում են, սպառնում. գյուղտեխնիկան չի կարողանում մտնել Արցախի Հացի գյուղի դաշտեր

Գյուղի վարելահողերի մի մասն անցել է թշնամու վերահսկողության տակ, մնացածի գերակշիռ մասն էլ՝ շուրջ 90 տոկոսը, ադրբեջանցի զինծառայողների ուղիղ նշանառության տակ է։

«Մոտ 40 հա վարելահող, որտեղ ցորեն ու գարի էինք ցանում, ընդհանրապես չի մշակվում հիմա։ Հենց սահմանին կպած են։ Գյուղին պատկանող վարելահողերն ու ֆերմաները, որտեղ մարդիկ աշխատում էին, թշնամու ուղիղ նշանառության տակ են։ Դրա համար էլ մարդիկ վաճառում են անասուները։ Եթե 2020 թվականին 244 գլուխ խոշոր եղջերավոր անասուն կար գյուղում, հիմա 140-նն է մնացել։ Ու շարունակում է նվազել թիվը, սահմանամերձ դառնալուց հետո մարդիկ էլ չեն կարողանում անասուն պահել»,- «Փաստինֆո»-ին ասել է Հացիի համայնքապետ Սանթուր Սարգսյանը։

2020թ․ ադրբեջանական ագրեսիայի հետևանքով սահմանամերձ դարձած Արցախի Մարտունու շրջանի Հացի համայնքում գարնանացանի աշխատանքները դեռ չեն սկսել։Համայնքապետի փոխանցմամբ՝ գյուղատնտեսական տեխնիկան չի կարողանում մտնել տարածք․ ադրբեջանցիները կա՛մ կրակում են, կա՛մ սպառնում, որ կկրակեն։