Ադրբեջանը Հայաստանի դեմ վարում է հիբրիդային պատերազմ

Ադրբեջանը շարունակում է ռազմական գործողություններով քաղաքական ճնշումներ գործադրել Հայաստանի վրա՝ Զանգեզուրյան միջանցքը ստանալու համար: Ադրբեջանական բանակը նախօրեին ռազմական գործողություններ էր ծավալել ՀՀ սուվերեն տարածքի նկատմամբ՝ հայ զինվորականներ սպանելով և գերեվարելով: Միայն ռուսական կողմի միջամտության արդյունքում ռազմական գործողությունները հնարավոր է եղել դադարեցնել, սակայն դա չի նշանակում, որ Բաքուն չի շարունակելու սադրանքները հայ-ադրբեջանական սահմանի տարբեր ուղղություններում: Ադրբեջանն օգտվում է Հայաստանում ստեղծված ռազմա-քաղաքական բարդ իրավիճակից՝ սոցիալ-տնտեսական խնդիրներ, արտագաղթ, բանակում տիրող վիճակ, որպեսզի առավելագույն տարածքային զիջումներ կորզի Երևանից: Առաջին հերթին Ադրբեջանին հետաքրքրում է Զանգեզուրի միջանցքը՝ Բաքվում շատ սուր են ընկալում Երևանից հնչող այն մեսիջները, որ միջանցքի թեման փակված է՝ միջանցք չի լինելու, այլ միայն բացվելու են կոմունիկացիաները: Ադրբեջանը ռազմական ուժով ցանկանում է ստիպել ՀՀ իշխանություններին՝ Բաքվին տրամադրել ցամաքային ուղիղ հաղորդակցություն՝ Սյունիքով դեպի Նախիջևան: Պատահական չէ, որ Թուրքիան և Ադրբեջանը Զանգեզուրի միջանցքը ներկայացնում են, որպես թյուրքական աշխարհը միավորող կամուրջ: Դրան զուգահեռ, Ադրբեջանը ռազմական սադրանքներով բարելավում է իր դիրքերը՝գրավում է բարձրունքներ, որտեղից կարող է հսկողություն սահմանել ՀՀ կարևորագույն մայրուղիների նկատմամբ՝ ցանկացած պահի հարվածելով դրանց: Բաքուն կրակելով սահմանամերձ գյուղերի ուղղությամբ՝ հայաթափման գործողություններ է ձեռնարկում՝ վախի մթնոլորտ տարածելով ՀՀ սահմանամերձ գյուղերում՝ այդ կերպ դատարկելով այդ գյուղերը՝ապագայում դրանք ադրբեջանցիներով բնակեցնելու կամ այնտեղ ադրբեջանական դիրքեր տեղակայելու համար: Ադրբեջանը հիբրիդային պատերազմ է վարում Հայաստանի և Արցախի դեմ՝կիրառելով թե հոգեբանական ճնշման, թե ռազմա-քաղաքական ճնշման մեխանիզմներ: Հայաստանը պետք է օպերատիվ կերպով վերազինի բանակը՝Ադրբեջանին ադեկվատ արձագանքելու համար, քանի որ Բաքուն շարունակելու է սադրանքները՝անտեսելով անգամ Մոսկվայի միջնորդությունները:

Արտյոմ Բալասանով