ԱՄՆ-ն Վրաստանը դարձնում է Սև ծով-Կասպից ծով առանցքի կարևորագույն տարր

Վրաստանի Փոթի քաղաքում նոր ծովային նավահանգիստ է կառուցվել։ Ծրագիրն իրականացվել է PACE Group-ի և ԱՄՆ Միջազգային զարգացման ֆինանսական կորպորացիայի (DFC) կողմից։ Նշվում է, որ տվյալ ծրագրի արժեքը 120 մլն դոլարէ։

ԱՄՆ-ն շարունակում է Վրաստանը դիտարկել, որպես թիվ մեկ ռազմավարական դաշնակից Հարավային Կովկասում: Վրաստանն ունի լուրջ տարաձայնություններ ՌԴ-ի հետ՝ աբխազական և հարավօսական խնդիրների պատճառով, ինչպես նաև իր արտաքին քաղաքական առաջնահերթություն է հռչակել անդամակցությունը ՆԱՏՕ-ին և ԵՄ-ին:

Վրաստանն ԱՄՆ-ի համար կարևորագույն էներգետիկ-տրասնպորտային հանգույց է, որը թույլ է տալիս կասպյան էներգակիրներն ու բեռները տարանցել դեպի Եվրոպա՝ շրջանցելով ՌԴ-ն: ԱՄՆ-ն տասնամյակներ շարունակ միլիարդավոր դոլարների օգնություն է տրամադրել Թբիլիսիին՝ տնտեսական ծրագրեր իրականացնելու, լոգիստիկ հզորություններ ստեղծելու, բանակն արդիականացնելու համար: ԱՄՆ-ՌԴ հակասությունների սրման ֆոնին Սև ծով ելք ունեցող և ՌԴ-ին սահմանակցող Վրաստանի դերն Արևմուտքի, ՆԱՏՕ-ի համար ավելի է մեծանում:

ԱՄՆ-ն ցանկանում է կառուցել Եվրոպա-Կովկաս-Կենտրոնական Ասիա միջանցքը, որի բաղկացուցիչ մաս են կազմելու վրացական լոգիստիկ հնարավորություններն, այդ թվում Փոթի և Բաթումի նավահանգիստները:

Թուրք-ադրբեջանական տանդեմը միլիարդավոր դոլարների ներդրումներ է իրականացրել վրացական տնտեսության, ենթակառուցվածքների մեջ, այդ թվում Բաքու-Թբիլիսի-Ջեյհան նավթամուղի, TANAP գազամուղի, Բաքու-Թբիլիսի-Կարս երկաթգծի, Բաքու-Թբիլիսի-Սև ծով ավտոմայրուղու կառուցման մեջ:

ԱՄՆ-ն ցանկանում է Վրաստանի միջոցով միմյանց կապել Կենտրոնական Ասիայի նավթագազային ռեսուրսներ ունեցող երկրները՝ Ղազախստանն ու Թուրքմենստանն՝ Արևելյան Եվրոպայի երկրների՝ Ուկրաինա, Բուլղարիա, Ռումինիա և այլ երկրների հետ, որպեսզի ձևավորվի Մոսկվայի ազդեցությունից դուրս, ՌԴ-ն շրջանցող Սև ծով-Կասպից ծով առանցքը՝ ռուսական Գազպրոմից ԵՄ-ի գազային կախվածությունը կասպյան էներգակիրների միջոցով նվազեցնելու նպատակով:

Նավթագազային ռեսուրսներ չունեցող Վրաստանը դառնում է կապող կամուրջ Արևելք-Արևմուտք ուղղության վրա՝ ստանալով թե գեոպոլիտիկ դիվիդենտներ՝ բարձրացնելով իր դերն ու նշանակությունն Արևմուտքի համար, ինչպես նաև իր տարածքով տարանցելով ադրբեջանական, կենտրոնականասիական և ամենակարևորը՝ չինական բեռները:

Այսպիսով, Վրաստանն իր աշխարհագրական դիրքից քաղում է առավելագույն տնտեսական, քաղաքական դիվիդենտներ՝ ներգրավվում է թուրք-ադրբեջանական, արևմտյան, չինական ներդրումներ:

Արտյոմ Բալասանով