Դատական համակարգը դիմադրում է․ Փաշինյանի «գրոհը» շարունակվում է

Դատավոր Բորիս Բախշիյանի կալանավորման միջնորդության քննությունը տեղի կունենա այսօր, ժամը 18:00-ին։

Դավիթ Արղամանյանը, որը քննելու է Բորիս Բախշիյանի կալանքի հարցը, Սուրեն Պապիկյանի խորհրդականներից է եղել, դատական համակարգ է եկել «հեղափոխականների» թիմից։ Դե, հասկանում եք` գործը «պատահականորեն» մակագրվել է նրան` «պատահական» հեղափոխության արդյունքում «պատահական» իշխանություն դարձածների կողմից։

Ինքնին հասկանալի է, որ իշխանությունն արել է ամեն ինչ՝ Բորիս Բախշիյանի կալանքը երաշխավորված դարձնելու համար։ Փաշինյանը կարծում է՝ միայն նման ռեպրեսիվ մեթոդը կարող է «ճիշտ» ուղերձ լինել դատական համակարգին, որը կանգնած է ճակատագրական երկընտրանքի առաջ՝ պայքարել իր ինստիտուցիոնալ անկախության համար կամ «կապիտուլացվել» Նիկոլ Փաշինյանի ու գործադիր իշխանության կողմից։

Ի դեպ, Բախշիյանի դեպքը եզակի չէ, դատական իշխանությունը ենթարկվում է տոտալ գրոհի։ Վարչական դատարանի մի շար դատավորներ հանդես են եկել հայտարարությամբ, որտեղ փաստվում է, թե ճնշումների են ենթարկվում՝ Վանաձորի ավագանու ընտրությունների հետ կապված «Լուսավոր Հայաստան» կուսակցության իշխանահաճո հայցը մերժելուց հետո։

Չեչնիայի ղեկավարի ամբողջ շրջապատը` պետական այրեր, մի քանի օր շարունակ, սպառնում են սպանել Չեչնիայի մի նախկին դատավորի ընտանիքի անդամների։ Չենք կարծում՝ Նիկոլ Փաշինյանի համար նման գործելաոճը խորթ լիներ։ Ուղղակի մեր հասարակության արժեհամակարգը թույլ չի տալիս, որ Փաշինյանը նման «անկեղծ» մարտահրավեր նետի դատական համակարգին։

Բայց դատական համակարգն այս պահին Նիկոլ Փաշինյանի «թշնամին» է, որի դեմ «գրոհը» շարունակվում է։ Դատական համակարգը դեռ դիմադրում է՝ հանուն Հայաստանի ժողովրդավարացման։

Վահրամ Բագրատյան