Դումանյանը սեփականաշնորհո՞ւմ է ոստիկանական համակարգի «փառքը»

Կառավարության այսօրվա նիստին գործադիրի անդամները օրակարգային հարցերը քննարկելու ժամանակ անդրադարձ կատարեցին նաև պարեկային ծառայողների աշխատանքի արդյունավետությանը։ Հետաքրքիր է, որ այդ քննարկմանը բավականին ակտիվ մասնակցություն ունեցավ ԿԳՄՍ նախարար Վահրամ Դումանյանը, որը բավականին մեծ նախանձախնդրությամբ էր ներկայացնում ոստիկանական համակարգում իրականացված բարեփոխումները։ «Ես կարևորում եմ այն, որ, ըստ էության, փոխվել է մի շատ կարևոր բան՝ վերաբերմունքը ոստիկանության նկատմամբ։ Միգուցե, դրա պատճառն այս ռեֆորմներն էին, հնարավոր է, որ այլ բան էլ կա։

Բայց, եթե որոշ ժամանակ առաջ անվստահություն կար ոստիկանների նկատմամբ, կար հարաբերությունների որոշակի խզում, ապա այսօր ոստիկանությունը ներդաշնակ է հասարակության հետ, լարում չկա, տարանջատում ևս։ Եվ դա մեծ ձեռքբերում է»,- իր խոսքում նշել էր Դումանյանը։ Իրականում, ԿԳՄՍ նախարարի հայտարարության տեքստում որևէ արտառոց բան չկար, պարզապես, հարց է առաջանում, թե ամենածանրաբեռնված ու միանգամից հինգ՝ կրթության, գիտության, սպորտի, մշակույթի և երիտասարդության ոլորտները համակարգող Վահրամ Դումանյանն այլ «դարդ ու ցավ» չունի՞ կամ արդյոք ժամանակը չէ՞, որ ԿԳՄՍՆ-ն այնպիսի գործունեություն ծավալի, որպեսզի Կառավարության նիստերին Դումանյանն իր համակարգած ոլորտի ձեռքբերումների մասին նույն խանդավառությամբ խոսի։

Նարե Գևորգյան