Եռաբլուրում մեկը լուսանկարվում է, մյուսը՝ ընկերներին է այցելում․ Մանուկյանը՝ Լուսինե Բադալյանի մասին

«Քանի որ խոսքը վերաբերում է անվտանգային խնդիրներին, ձեռնպահ կմնանք հրապարակային որևէ բան ասելուց, հարկ եղած դեպքում, պատկան մարմինների հետ առանձին քննարկումներ կունենանք։ Մեր զինվորների կողքին ենք և կարծում եմ, որ ցանկացած պատասխանատու հայ մարդ իր ուժերի ներածին չափով նաև բարոյական աջակցություն պետք է ցույց տա այս դժվարին պահին հայրենիքի սահմանը պաշտպանողներին»,- այս մասին այսօր MediaHub.am-ի հետ զրույցում ասաց ԱԺ «Հայաստան» խմբակցության պատգամավոր Գեղամ Մանուկյանը։ Հարցին՝ արձանագրվե՞լ են նման խնդիրներ, որոնք ցանանում եք քննարկել պատկան մարմինների հետ՝ Մանուկյանը պատասխանեց․ «Վստահաբար խնդիրներ կան, բազմաթիվ են հարցերը և վստահաբար դրանք համակարգային լուծումներ են պահանջում։ Քննարկումները անդադար պրոցեսներ են և ոչ հանրային քննարկման առարկա են, որոնց շուրջ քննարկումներ ծավալվում են»։ Մանուկյանը չցանկացավ գնահատական տալ ՔՊ-ական պատգամավոր Լուսինե Բադալյանի՝ Եռաբլուրում ծիծաղելուն՝ նշելով․ «Ձեռնպահ կմնամ այդ թեմայով խոսելուց, որովհետև հասարակական արձագանքն արդեն ամեն ինչ ասում է։ Ես այն մարդկանց թվում եմ եղել, ովքեր հիշում են դեռ առաջին զոհերին, ովքեր հուղարկավորվեցին Եռաբլուրում։ Այնտեղ ունեմ բազմաթիվ թանկագին ընկերներ, հարյուրավոր դաշնակցական ընկերներ՝ ինչպես առաջին ազատամարտի ժամանակ զոհված, այնպես էլ վերջին պատերազմի։ Եռաբլուրն ամեն մեկի համար յուրովի է՝ մեկի համար լուսանկարվելու վայր, մյուսի համար հարազատ ընկերներին այցելելու վայր»։ Արմինե Նավոյան