Ինչո՞ւ չի կայանալու կայծակնային շախմատի առաջնության ստուգատեսը

Արագ և կայծակնային շախմատի ընթացիկ տարվա աշխարհի առաջնությունը նախատեսված էր անցկացնել Ղազախստանի մայրաքաղաք Նուր Սուլթանում՝ դեկտեմբերի 25-31-ը: Սակայն, ինչպես հայտնում է ՀԱՕԿ-ը, նշած վայրում ստուգատեսը չի կայանա։ Պատճառը կորոնավիրուսի նոր շտամի տարածումն է, քանզի մասնակիցները պետք է մեկ շաբաթ մեկուսանային:

Մրցաշարին մասնակցելու էին նաև Հայաստանի շախմատիստները: Աշխարհի առաջնության մրցանակային ընդհանուր հիմնադրամը կազմում է մեկ միլիոն ԱՄՆ դոլար:

ՖԻԴԵ-ն փնտրում է մրցումների անցկացման նոր հանգրվան:

Նման ձևաչափով առաջնությունները անցկացվում են 2012 թվականից: Արագ և կայծակնային շախմատի աշխարհի առաջնության գործող չեմպիոնը, դասական շախմատի թագակիր, նորվեգացի Մագնուս Կառլսենն է: