Նոր բունտ է հասունանում․ ավտոմեքենաների ԱՊՊԱ-ները մինչև մի քանի անգամ թանկանալու են

Վարորդները ԱՊՊԱ պայմանագրերի կնքման համար կախված դասից այսուհետ անհամեմատ թանկ են վճարելու։ Մասնավորապես, փետրվարի 7-ից տեղի կունենան հետևյալ փոփոխությունները ԱՊՊԱ ոլորտում․ 01/11/2017 -31/12/2021 միջակայքում ապպա չկնքած կամ հիմա առաջին անգամ ապպա կնքելիս ԱՊՊԱ-ի ստանդարտ արժեքը կլինի 41.000 դրամ ,անկախ ձիաուժից, եթե քո պատճառով հատուցվել է 1. 0-100.000 դրամ , ապա դասը կբարձրանա 3 դասով 2. 100.000-200.000 դրամ դասը կբարձրանա 4 դասով 3. 200.000-500.000 դրամ դասը կբարձրանա 5 դասով 4. 500.000-1.000.000 դրամ դասը կբարձրանա 6 դասով 5. 1.000.000-1.800.000 դրամ դասը կբարձրանա 7 դասով 6. 1.800.000 դրամից ավել 8 դասով, որը կհասնի մինչև 300 % թանկացման Իսկ վթար չունեցողների համար կթանկանա տարեկան 3 000 դրամ, ինչի վրա կկիրառվի նաև նրանց ընթացիկ զեղչը։

MediaHub.am-ը մի քանի ապահովագրական ընկերություններ էր զանգահարել և, որպես հաճախորդ ներկայանալով, փորձել պարզել, թե թանկացումներն ինչի հետ են կապված և արդյոք շրջանառվող տեղեկությունը համապատասխանում է իրականությանը։ Մեր զանգահարած գրեթե բոլոր ապահովագրական ընկերություններից ստացանք նույնաբովանդակ պատասխան։ Աշխատակիցները նշում էին, որ թանկացումը կախված է դասերից, որքան բարձր է դասը, այնքան թանկ է լինելու ապահովագրությունը։ Հարցին, թե ինչո՞վ է պայմանավորված գների վերանայումը, մեր զրուցակիցներից մեկը նշեց, որ հիմնականում 1-5 դասի վարորդներ են մեքենաներ ապահովագրում, ինչի հետևանքով էլ ապահովագրությունը բավականին էժան է լինում, և այս պարագայում ապահովագրական ընկերություններին ձեռնտու չէ աշխատելը։ Ավելին, մի քանի ապահովագրական ընկերություններ հունվարի 3-ից սկսած հրաժարվում են ապահովագրել բարձր դասի վարորդների մեքենաները, քանի որ նրանց մասնակցությամբ վթարների հավանականությունը ավելի մեծ է և սպասում են գների բարձրացմանը, որից հետո նոր սակագներով արդեն կկնքեն պայմանագրեր։ MediaHub.am-ի հետ զրույցում խնդրով մտահոգված քաղաքացիներից մեկը՝ Աննա Մինասյանը, հայտնեց, որ նախապատրաստում են բողոքի ակցիա իրականացնել։ Նրա խոսքով՝ վարորդները բողոքելու են ոչ միայն թանկացումների, այլ նաև ընկերությունների ամփույթ վերաբերմունքի դեմ։

Արմինե Նավոյան