ՊՆ, ԳՇ պետ, ԵԿՄ նախագահ և ոչ միայն․ ովքե՞ր չշնորհավորեցին Բանակի օրը

Երեկ՝ հունվարի 28-ին, Հայաստանում այդպես էլ որևէ կերպ չնշվեց հայոց բանակի կազմավորման 30-ամյակը։ Սակայն տոնը չնշելը միակ պատճառը չէ, ինչը զայրացրել է մի շարք քաղաքացիների։ Բանակի օրը ոչ միայն չնշվեց, այլ նաև մի շարք պաշտոնյաներ, այդ թվում բանակի բարձրաստիճան ղեկավարությունը, շնորհավորական որևէ ուղերձ չհղեցին տոնի առթիվ։ Արձակուրդից հունվարի 26-ին վերադարձած պաշտպանության նախարար Սուրեն Պապիկյանը երեկ Բանակի օրվա առթիվ բարձրաստիճան պաշտոնյաների հետ այցելել էր «Եռաբլուր» զինվորական պանթեոն։

Սակայն նախարարը որևէ շնորհավորական ուղերձ չէր հղել։ Տոնի առթիվ չշնորհավորեց նաև Գլխավոր շտաբի պետ Արտակ Դավթյանը։ ԵԿՄ նախագահ Սասուն Միքայելյանը ևս չի շնորհավորել, ավելին, մամուլում չկա տարածված տեղեկատվություն, թե նա որտեղ և ինչպես է նշել Բանակի օրը։ Անվտանգության խորհրդի քարտուղար Արմեն Գրիգորյանի շնորհավորանքը սահմանափակվել է լրատվամիջոցներից մեկին տված հարցազրույցի սկզբում շնորհավորական խոսք ասելով և այդ մասին ֆեյսբուքյան իր էջում տեղեկացնելով։ ԱԺ նախագահ Ալեն Սիմոնյանը Բանակի օրը շնորհավորել է միայն ֆեյսբուքյան իր էջում, իսկ ԱԳՆ-ի ֆեյսբուքյան էջում տարածվել է ընդամենը նախարարության շնորհավորանքը, որտեղ Արարատ Միրզոյանի անունը չի հիշատակվում։ Թե՛ ԱԺ-ի և թե՛ ԱԳՆ-ի պաշտոնական կայքերում բացակայում է շնորհավորական ուղերձները։ Մի շարք նախարարներ ևս չեն շնորհավորել Բանակի օրվա առթիվ, սակայն որոշները երեկ եղել են «Եռաբլուրում»։