Բլե՞ֆ, թե՞ իրական գործընթաց․ Փաշինյանը սկսում է պարտիան

Նախօրեին Նիկոլ Փաշինյանը որոշում է ստորագրել՝ սահմանադրական բարեփոխումների խորհրդի անհատական կազմը հաստատելու մասին։ Մի քանի կետեր ունեցող որոշման մեջ հստակ արձանագրվում է նաև սահմանադրական ենթադրյալ փոփոխությունների ժամանակացույցը, որով սահմանվում է՝ մինչև 2023 թվականի հունիսի 30-ը հաստատել հանձնաժողովի կողմից մշակված՝ Հայաստանի Հանրապետության Սահմանադրության փոփոխությունների նախագիծը և ներկայացնել Հայաստանի Հանրապետության վարչապետի աշխատակազմ։

Թվում է՝ ամեն բան նորմալ է։

Բոլորն են խոսում սահմանադրական փոփոխությունների անհրաժեշտության մասին, ընդ որում՝ այն պահից սկսած, երբ 2015-ին Հայաստանն անցում կատարեց կառավարման խորհրդարանական համակարգին։

Արմատական ընդդիմախոսներն ի սկզբանե պնդում էին, որ 2015-ի սահմանադրական փոփոխությունները պետք է չեղարկվեն, որովհետև դրանք ընդունվել են՝ Սերժ Սարգսյանի իշխանությունը վերարտադրելու համար։

2018-ից հետո, արդեն Նիկոլ Փաշինյանի ընդդիմախոսները պնդում էին, որ սահմանադրությունը վերանայել է պետք, որովհետև կառավարման մոդելը ոչ թե խորհրդարանական է, այլ՝ սուպերվարչապետական։

Պատերազմից հետո սահմանադրական ռեֆորմի անհրաժեշտության մասին ավելի հաճախ խոսեցին՝ թե ֆորս-մաժորային իրավիճակներում կառավարման արդյունավետության բարձրացման և թե ներքաղաքական ճգնաժամի հաղթահարման տեսանկյուններից։

Նիկոլ Փաշինյանի մանիպուլյացիոն մարտավարությունը ցայտուն դրսևորվեց նաև սահմանադրական փոփոխությունների հարցում։ Մեկ տարի առաջ, երբ ընդդիմությունը պահանջում էր նրա հրաժարականը, Փաշինյանը խոստանում էր սահմանադրական ռեֆորմ, անցում կիսանախագահական կառավարման համակարգին, անգամ ժամկետներ էր նշում։

ԱԺ արտահերթ ընտրություններից հետո Փաշինյանը մտափոխ եղավ․ իշխանության հարցը լուծված էր ու նա արդեն, ըստ էության, դեմ էր կառավարման համակարգի փոփոխությանը։

Վերջին առցանց ասուլիսում Փաշինյանն ավելի «անկեղծացավ»՝ պարզվեց, որ սահմանադրական փոփոխությունները քողարկված նպատակ ունեին նաև «կապիտուլացնել» նախագահական ինստիտուտը։ Քանի որ Արմեն Սարգսյանն արդեն հրաժարական է տվել, սահմանադրական ռեֆորմի անհրաժեշտությունը դրվեց կասկածի տակ։ Նման հայտարարություն արվեց Նիկոլ Փաշինյանի մակարդակով։ Մեծ հարց է՝ Սահմանադրությունը կփոխվի, թե ոչ. արդեն երեկ պնդում էր սահմանադրական բարեփոխումների խորհրդի անդամ Էդմոն Մարուքյանը, որը վերջին շրջանում իշխանությանը ներդաշնակ դիրքորոշումներ է հայտնում։ Բլե՞ֆ, թե՞ իրական գործընթաց․ կերևա այն պարտիայի վերջում, որն օրերս սկսել է Փաշինյանը։

Վահրամ Բագրատյան