Հայ-ադրբեջանական սահմանի բախումները ռուս խաղաղապահների պատասխանատվության գոտում չեն. Ալիևը՝ Պուտինին

ՌԴ նախագահ Վլադիմիր Պուտինն այսօր Սոչիում Ադրբեջանի նախագահ Իլհամ Ալիևի հետ կայացած առանձնազրույցի ժամանակ հայտարարեց, որ Ռուսաստանը զգալի ներդրում ունի Լեռնային Ղարաբաղի հակամարտության կարգավորման գործում։

Նրա խոսքով` ռուս խաղաղապահները և ռուս-թուրքական զինադադարի կառավարման կենտրոնը դրական դեր ունեն ու ակտիվորեն աշխատում են տարածաշրջանում խաղաղության պահպանման ուղղությամբ։

«Ցավոք, դեռ կան խնդիրներ։ Տեղի են ունենում միջադեպեր, մինչ օրս չի ստացվում խուսափել նաև զոհերից։ Դրա համար էլ հավաքվել ենք, որ քննարկենք, թե ինչ է արվել ու ինչ է պետք անել` նման միջադեպերը կանխելու, տարածաշրջանում իրավիճակի հանդարտեցման ու տարածաշրջանի զարգացման համար անհրաժեշտ պայմանների ստեղծման համար»,– ասել է Պուտինը։

Ալիևն, իր հերթին, նշել է, որ ռուս խաղաղապահների պատասխանատվության գոտում լուրջ միջադեպեր չեն գրանցվել, և շփման գծում բախումները ռուս խաղաղապահների պատասխանատվության գոտում չեն: