Թուրքիան վերածվում է էներգետիկ-տրանսպորտային խաչմերուկի

Թուրքիան կարևորում է Ասիան և Եվրոպան միացնող Բաքու-Թբիլիսի-Կարս երկաթգծի աշխատանքն ու պատրաստվում է ավելացնել այդ ուղղությամբ բեռնափոխադրումները տարեկան 3.2 միլիոնն տոննայից հասցնելով մինչև 6.5 միլիոն տոննա: Այդ մասին հայտարարել է Թուրքիայի տրանսպորտի և ենթակառուցվածքների նախարար Ադիլ Քարաիսմաիլօղլուն:

Թուրքիան վերածվում է էներգետիկ-տրանսպորտային միջանցքի՝Չինաստանի Կենտրոնական Ասիայի, Ադրբեջանի համար: Թուրքիան ցանկանում է տարանցիկ ծառայություններ մատուցել՝ստանալով տնտեսական, ինչպես նաև գեոպոլիտիկ դիվիդենտներ: Վերջին տարիներին Անկարան միլիարդավոր դոլարներ է ներդնում իր լոգիստիկան արդիականացնելու համար՝Ստամբուլի ջրանցք, Ստամբուլի նոր օդանավակայան, երկաթգծեր, ճանապարհներ և այլն:

Պետք է նշել, որ Թուրքիայի համար կարևոր է Ադրբեջանի լոգիստիկ ներուժի օգտագործումը, քանի որ Ադրբեջանը պատուհան է Կենտրոնական Ասիայի՝Ղազախստանի և Թուրքմենստանի համար դեպի Կովկաս և Թուրքիա: Թուրքիա-Վրաստան-Ադրբեջան միջանցքի շնորհիվ Անկարան կարողանում է կենտրոնացնել չինական, կենտրոնականասիական, ադրբեջանական բեռներն ու դրանք իր տարածքով տեղափոխելով դեպի եվրոպական շուկաներ: Նավթագազային ռեսուրսներ չունեցող Թուրքիայի համար կարևոր է ստանձնել էներգետիկ կամրջի դերակատարություն՝նավթով և գազով հարուստ, թյուրքախոս Ադրբեջանի, Ղազախստանի, Թուրքմենստանի համար:

Հիշեցնենք, որ Չինաստանը կյանքի է կոչում Մետաքսի ճանապարհի մեգանախագիծը, որի մի ուղղություններից մեկն անցնում է Ղազախստանով, Ադրբեջանով, Վրաստանով և Թուրքիայով:

Նշենք, որ բացի Արևելք-Արևմուտք ուղղությունից, Թուրքիան ակտիվացնում է էներգետիկ-տրանսպորտային կապերը նաև Հյուսիս-Հարավ ուղղության վրա: Կյանքի է կոչվում Թուրքական հոսք գազամուղը, տարիներ շարունակ գործում է Երկնագույն հոսք գազամուղը՝ռուսական գազն այդ խողովակաշարերով դուրս է գալիս թուրքական և եվրոպական շուկաներ: Դրան զուգահեռ, Թուրքիան ակտիվացնում է իր էներգետիկ կապերն Իրանի հետ՝իրանական գազ ներկրելով իր ներքին սպառման համար:

Այսպիսով, Թուրքիան ցանկանում է մաքսիմալ կերպով օգտագործել իր աշխարհագրական բարենպաստ դիրքն ու իր վրա կենտրոնացնել էներգետիկ, տրանսպորտային հոսքերը՝տարանցման համար ստանալով տնտեսական օգուտներ, ինչպես նաև բարձրացնելով իր գեոպոլիտիկ կարևորությունը մի քանի ուժային կենտրոնների՝Արևմուտքի, Չինաստանի, ՌԴ-ի համար:

Արտյոմ Բալասանով