Ո՞ր ռուսաստանաբնակ հայ մեծահարուստն է ընդգրկվել «ՌԴ անշարժ գույքի արքաներ» վարկանիշային ցանկում

Անշարժ գույքի ռուսական շուկայի առաջատարները՝ 2020 թվականին գրանցած կորստից հետո 2021 թվականին ավելացրել են իրենց եկամուտները: Այդ մասին տեղեկանում ենք Forbes-ի հրապարակած «ռուսական անշարժ գույքի արքաներ» վարկանիշային աղյուսակից:

Ցանկում առաջին տեղը մի քանի տարի շարունակ զբաղեցնում է ադրբեջանցիներ Գոդ Նիսանովի և Զարախ Իլիևի «Կիևյան հրապարակ» ընկերությունների խումբը: Այն ՌԴ-ում կոմերցիոն անշարժ գույքի խոշորագույն սեփականատերերից մեկն է և ներառում է այնպիսի նախագծեր, որոնցից են «Եվրոպեյսկի» առևտրաժամանցային կենտրոնը և «Ֆուդ սիթի» ցանցը: Ընկերության եկամուտը 2021-ն կազմել է 1,67 մլրդ դոլար (2020-ին` 1,28 մլրդ):

Երկրորդ տեղը զբաղեցնում է Սամվել Կարապետյանի «Տաշիր» ընկերությունների խումբը՝ 615 մլն դոլար եկամուտով՝ 2020-ի 585 մլն դոլարի համեմատ: «Տաշիրը» միավորում է 200 ընկերություն, որոնք գործում են տնտեսության տարբեր ոլորտներում, այդ թվում՝ շինարարական, արտադրական, ֆինանսական և էներգետիկ:

Առաջատար եռյակը եզրափակում է Միխայիլ և Սայիդ-Սալամ Գուցերիևների «Սամֆար» խումբը, որը 2021-ին 510 մլն դոլարի եկամուտ է ունեցել:

Առաջատար հնգյակում են ընդգրկվել նաև Ալեքսանդր Կլյաչինի Gleden Invest ընկերությունը՝ 385 մլն դոլար եկամուտով և Ingka Centres (նախկին IKEA Centres)-ը, որը ղեկավարում է 45 առևտրի կենտրոն և 2021 թվականին 350 մլն դոլարի եկամուտ է գրանցել:

«Ռուսական անշարժ գույքի արքաներ» վարկանիշային ցանկում Ռոման Աբրամովիչը հայտնվել է 19-րդ հորիզոնականում՝ 2021թ.-ին գրանցելով 105 մլն դոլար եկամուտ: Ցանկը, ընդհանուր առմամբ, բաղկացած է 30 հորիզոնականից: