Անկարան կառուցում է նոր թյուրքական կայսրություն

Թուրքիայի արտաքին գործերի նախարար Մևլյութ Չավուշօղլուն հայտարարել է, որ Անդրկասպյան Արևելք-Արևմուտք առևտրային տարանցիկ միջանցքը կամրապնդվի «Զանգեզուրի միջանցքով» և կնպաստի ողջ թյուրքական աշխարհի բարօրությանը:

Նման ելույթով Չավուշօղլուն հանդես է եկել Ստամբուլում Թյուրքական խորհրդի անդամ երկրների ԱԳ նախարարների նիստում:

Թուրքիան կառուցում է նոր թյուրքական կայսրություն, որի մեջ են մտնելու բոլոր թյուրքախոս երկրները՝Անկարայից մինչև Կենտրոնական Ասիա: Մեծ Թուրան կառուցելու համար Անկարան ստեղծում է նոր՝թյուրքական հարթակներ: Դա ինտեգրացիայի միայն առաջին փուլն է՝ապագայում Թուրքիան փորձելու է կազմաքանդել ՌԴ-ն և Իրանը, Չինաստանն ու այդ երկրներում ապրող թյուրքախոս ժողովուրդներին մասնակից դարձնել թյուրքական նոր կայսրության:

Թյուրքախոս երկրները միավորում են էներգետիկ-տրանսպորտային, քաղաքական, մշակութային, նաև ռազմական կապերը: Թուրքիան ռազմա-քաղաքական սերտ կապեր ունի Ադրբեջանի հետ՝անցկացվում են համատեղ զորավարժություններ, ինչպես նաև ռազմա-տեխնիկական կապեր է պահպանում ՀԱՊԿ-ի անդամ Ղազախստանի, Ղրղզստանի հետ:

Թյուրքական աշխարհի միավորմանը խոչընդոտում են Հայաստանն ու Արցախը, որոնք ընկած են Մեծ Թուրանի ճանապարհին: 44-օրյա պատերազմի ընթացքում Անկարան և Բաքուն փորձեցին վերջնականապես լուծել հայկական հարցը՝էթնիկ զտումներ իրականացնելով Արցախում՝հնարավորության դեպքում կիրականացնեին նաև Սյունիքում: Հայոց բանակը պայքարեց 44 օր, իսկ ռուսական ռազմական միջամտությունը թույլ չտվեց պանթուրքիստներին ծածանել թուրքական դրոշներ Արցախի սրտում՝Ստեփանակերտում:

Մեծ Թուրան կառուցելու Անկարայի ռազմավարությունն ազգային անվտանգության և տարածքային ամբողջականության սպառնալիք է ՌԴ-ի, Իրանի և Չինաստանի համար: Այդ երկրները պետք է ավելի ակտիվ աջակցություն ցուցաբերեն Հայաստանին, որն ենթարկվում է թուրք-ադրբեջանական տանդեմի հարվածներին և ռազմա-քաղաքական ճնշումներին: Հայկական դիվանագիտությունը պետք է ակտիվանա հենց այդ երկրների ուղղությամբ՝ՌԴ-ն ՀՀ-ի ռազմավարական դաշնակիցն է, ՀՀ-ում են տեղակայված ռուսական զորքերը, ՌԴ-ն՝միջուկային տերություն է: Չինաստանը՝ՄԱԿ-ի ԱԽ-ի անդամ է, միջուկային տերություն, աշխարհի ամենամեծ տնտեսությունը, որն ունի ույղուրական խնդիր իր տարածքում: Իսկ Իրանը 44-օրյա պատերազմից հետո հստակ մեսիջ հղեց Անկարային և Բաքվին, որ Հայաստանի տարածքային ամբողջականությունն՝Իրանի համար կարմիր գիծ է:

Արտյոմ Բալասանով